De Start vom U23

S‘erste Spiel vo de neui Saison staht ah, s‘U23 isch gwachse siit letztes Jahr! Ganz viel neui Gsichter, die ich eu vorstelle will. Heisset s beste Nachwuchsteam willkomme.

Jeanne, euse neue Turm, blockt all Bäll ab mit en starke Kaboom! Sunita, die sich mit euses Pass-team united, und Elena eusi neui Usse, mit ganz viel flair macht sie d‘defense und ahgriff. Und natürlich gaht sie ned vergesse, euses jüngste Kadermitglied, Milla, frisch im U23, staht sie mit ganz viel Muet ufm Feld. Die restlichi händ ihr hoffentlich in Erinnerig.

Und mit so viel Freud und Glamur fangt au euses erstes Spiel geg s‘S9. De erste Satz, hät sich schmiere lah wie weichi Butter. Aber, es nöchert sich e dunkli Wulke mit Westwind über eus, da chunt en Sturm.

Im zweite Satz hät S9 agfange wach zu werde, und uf eusi Siite? Es ungstümtes Gwitter. D‘vibes sind ‚off‘ gsie und mir händ meh mit eus als mit em Gegner z‘kämpfe kah. Leider händ mir deswege euse zweite Satz ah s‘S9 müsse abgeh.

Für de dritte Satz sind mir ready gsie (oder doch ned so ganz). Mir händ echli mit de Positione es knuusch kah, aber sind dafür ready gsie 110% z‘geh. Trotzdem isch es, es Chopf ah Chopf renne gsie.

De vierte Satz isch acho, mir sind meh als ready gsie de Sack zue z‘mache, deswege händ mir mit ganz viel Souveranität und Muet gspielt, um de letzte Satz ah eus zu risse. Das händ mir natürlich au gschafft.

Trotz em holprige Start händ mir ganz viel chöne mitneh für eusi nächsti Mätch. Mir würdet eus riesig freue wenn ihr eus wieder go aführe chömet.

Das Mal isch Nadia euse MVP gworde!

Bis zum nächste Mal!

(Samstig 27.9 KSC Wiedikon vs. VBC Limmattal)